អភិបាលខេត្តព្រះសីហនុ ជួបពិភាក្សាការងារជាមួយទីប្រឹក្សាស្ថានទូតចិន និងជាប្រធានការិយាល័យកិច្ចការអគ្គកុងស៊ុលចិនថ្មី ប្រចាំខេត្តព្រះសីហនុ

ព្រះសីហនុ: ថ្ងៃទី២៤ ខែវិច្ឆិកា ឆ្នាំ២០២៣ ឯកឧត្តម គួច ចំរើន អភិបាល នៃគណ:អភិបាលខេត្តព្រះសីហនុ បានទទួលជំនួបសម្តែងការគួរសមជាមួយលោក Fan Manjiang ទីប្រឹក្សាស្ថានទូត នៃសាធារណរដ្ឋប្រជាមានិតចិន និងជាប្រធានការិយាល័យកិច្ចការអគ្គកុងស៊ុលចិនថ្មី ប្រចាំខេត្តព្រះសីហនុ នៅសាលប្រជុំសាលាខេត្តព្រះសីហនុ ដោយមានការចូលរួមពីលោកអភិបាលរងខេត្ត ប្រធានមន្ទីរ អង្គភាពពាក់ព័ន្ធ នារសៀលថ្ងៃព្រហស្បតិ៍ ១១កើត ខែកត្ដិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៣ ខែវិច្ឆិកា ឆ្នាំ២០២៣ ។

លោក Fan Manjiang បានថ្លែងអំណរគុណឯកឧត្តមអភិបាលខេត្ត រៀបចំទឹកត្រចៀកកាំទទួល និងការស្វាគមន៍រូបលោក និងសហការី ក្នុងរយៈពេល២ខែ ដែលលោកបានបំពេញការងារនៅខេត្តព្រះសីហនុ ទទួលបានការគាំទ្រពីរដ្ឋបាលខេត្ត និងបានជួបជាមួយស្នងការនគរបាលខេត្ត ព្រមទាំងស្ថាប័នក្នុងខេត្តព្រះសីហនុ ។ លោកមានអារម្មណ៍ឃើញសណ្តាប់ធ្នាប់របស់ខេត្តល្អ បង្ក្រាបនូវឧក្រិដ្ឋកម្ម មិនអាចកាត់ផ្តាច់ចេញពីការគាំទ្រពីរដ្ឋបាលខេត្តបាននោះទេ។ ស្ថានភាពនៃការអភិវឌ្ឍរបស់ខេត្តកាន់តែល្អ និងមានអ្នកវិនិយោគចិន ចង់មកធ្វើការវិនិយោគនៅខេត្តព្រះសីហនុ ។ 

ចំណងមិត្តភាពរវាងប្រទេសចិន និងកម្ពុជា មានយូរអង្វែងជាមិត្តដែកថែប ហើយថ្មីៗនេះសម្តេចមហាបវរធិបតី ហ៊ុន ម៉ាណែត នាយកតដ្ឋមន្ត្រី នៃព្រះរាជាណាចក្រកម្ពុជា បានទៅធ្វើទស្សនកិច្ចនៅប្រទេសចិនពីរដងរួចមកហើយ និងបានពិភាក្សាគំនិតផ្តួចផ្តើមខ្សែក្រវាត់មួយ និងយុទ្ធសាស្ត្របញ្ចកោណឱ្យស៊ីជម្រៅជាមួយគ្នា ។ រាជរដ្ឋាភិបាលកម្ពុជាមានការយកចិត្តទុកដាក់ ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង និងការរៀបចំផែនការមេអភិវឌ្ឍន៍ខេត្ត ។

ឯកឧត្តម គួច ចំរើន បានអបអរសាទរលោក Fan Manjiang បានមកធ្វើបំពេញបេសកកម្ម ជាអគ្គកុងស៊ុលចិន ប្រចាំខេត្តព្រះសីហនុ ។ ក្នុងរយៈពេលដែលខ្ញុំធ្វើជាអភិបាលខេត្ត បានពិគ្រោះពិភាក្សាជាមួយ ឯកអគ្គរដ្ឋទូតចិន បង្កើតអគ្គកុងស៊ុលចិននៅខេត្តព្រះសីហនុ និងអរគុណឯកឧត្តមឯកអគ្គរដ្ឋ ទូតចិនផងដែរ ដែលបានផ្សាភ្ជាប់ជាមួយខេត្តព្រះសីហនុ និងបានជម្រាបជូនពីសក្តានុពលរបស់ខេត្ត មានកោះ, ឆ្នេរ, និងវិស័យទេសចរណ៍, មានកំពង់ផែទឹកជ្រៅរបស់កម្ពុជា, យើងមានកំពង់ផែស្វយ័តក្រុងព្រះសីហនុ ជាកំពង់ផែរបស់ជាតិ ក្នុងការដឹកជញ្ជូនទំនិញចេញ-ចូល ៥៨ភាគរយ ក្នុងក្របខ័ណ្ឌទំនិញ, មានផ្លូវល្បឿនលឿនជាសមិទ្ធផលផ្លូវមួយ ខ្សែក្រវាត់មួយ និងជាផ្លូវសូត្រសមុទ្រ, មានព្រលានយន្តហោះអន្តរជាតិ, និងបានពិភាក្សាការហោះហើរត្រង់ពីទីក្រុងអ៊ូស៊ី នៃខេត្តជាំងស៊ូ មកកាន់ខេត្តព្រះសីហនុ មានអ្នកវិនិយោគមកពីក្រុងអ៊ូស៊ី នៅខាងមុខសង្ឃឹមថា និងមានព្រឹត្តិការណ៍ជើងហោះហើរត្រង់ មកកាន់ខេត្តព្រះសីហនុ ។

 ក្រៅពីនេះក៏មានតំបន់សេដ្ឋកិច្ចពិសេសចេជាំង ដែលជាស្ពាន នៃទំនាក់ទំនងរវាងតំបន់សេដ្ឋកិច្ច ជាមួយក្រុង-ខេត្តព្រះសីហនុ បានជួយទ្រទ្រង់គ្រួសារប្រជាពលរដ្ឋបានមួយចំនួនធំ ។ ទោះក្នុងតំណាក់កាលកូវីដ-១៩ និងក្រោយកូវីដ-១៩ តំបន់សេដ្ឋកិច្ចនៅតែដំណើរការរបស់ខ្លួន ក្នុងការជួយបង្កើនសេដ្ឋកិច្ចរបស់ខេត្ត និងប្រជាពលរដ្ឋ ។ តំបន់សេដ្ឋកិច្ចចេជាំង បានជួយដល់កម្មកររបស់យើងបានជិត ១ម៉ឺននាក់ រួមចំណែកជួយកម្មកររបស់យើង និងមានគោលដៅពង្រីកអាជីវកម្មរបស់ខ្លួនបន្ថែមទៀត ។

ឯកឧត្តម គួច ចំរើន បានបន្តថា ខេត្តព្រះសីហនុក្រោមការដឹកនាំរបស់រាជរដ្ឋាភិបាល ចាត់ទុកខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង ផ្អែកតាមការពិគ្រោះយោបល់របស់ប្រមុខរដ្ឋាភិបាល នៃប្រទេសទាំងពីរ ទាក់ទងការរៀបចំផែនការមេ ក្រសួងសេដ្ឋកិច្ចបានជ្រើសរើសទីក្រុងស៊ីនជិន ជាទីប្រឹក្សាពិគ្រោះយោបល់រៀបចំផែនការមេ បន្តទៅមុខយ៉ាងរលូន ។

 បើមិនមានការប្រែប្រួលផែនការនេះនឹងបញ្ចប់នៅខែមីនា ឆ្នាំ២០២៤ខាងមុខ ប្រែក្លាយខេត្តព្រះសីហនុ ជាតំបន់ឧស្សាហកម្ម, ពាណិជ្ជកម្ម, ទេសចរណ៍, ត្រូវការពេលវេលាដើម្បីជំរុញបច្ចេកវិទ្យាកម្រិតខ្ពស់ ពិសេសជំរុញធនធានមនុស្ស ឈានទៅតំបន់ឧស្សាហកម្ម និងការអភិវឌ្ឍខេត្តព្រះសីហនុ ដោយជ្រើសរើសយករដ្ឋបាល ពិសេស ឬរដ្ឋបាលស្វយ័ត កិច្ចការសំខាន់ត្រូវការឈ្វេងយល់បន្ថែមទៀត។ សង្ឃឹមថានឹងជួយសម្របសម្រួលទៅលើការសិក្សារដ្ឋបាលពិសេស ឬរដ្ឋបាលស្វយ័ត គោលដៅតម្រង់ទិសខេត្តព្រះសីហនុ ជាផ្សារហិរញ្ញវត្ថុ ដោយសង្ឃឹមថា នឹងកើតឡើងតំបន់សេដ្ឋកិច្ចពិសេសលីវនីញ ប្រទេសចិន នៅលើទឹកដីខេត្តព្រះសីហនុ ។

ក្នុងឱកាសនោះ ឯកឧត្តមអភិបាលខេត្ត បានស្នើសុំឱ្យអគ្គកុងស៊ុលចិនប្រចាំខេត្តព្រះសីហនុ ជួយជំរុញការហោះហើរត្រង់ពីប្រទេសចិន មកខេត្តព្រះសីហនុ ។ ជួយជំរុញការសាងសង់មន្ទីរពេទ្យតំបន់នៅខេត្តព្រះសីហនុ និងជួយជំរុញការសាងសង់ ជួសជុលផ្លូវជាតិលេខ៣ឡើងវិញ ពីវាលរេញដល់ត្រពាំងរពៅ ដែលមានចម្ងាយប្រមាណ ២០គីឡូម៉ែត្រ ។

ជាការឆ្លើយតបទៅនឹងសំណើ របស់ឯកឧត្តមអភិបាលខេត្តព្រះសីហនុ លោក Fan Manjiang សន្យាពាំនាំសំណើរ សំណូមពររបស់អភិបាលខេត្តព្រះសីហនុ ទៅស្ថានទូតចិនប្រចាំកម្ពុជា និងរដ្ឋាភិបាល ចិន ដើម្បីជំរុញការហោះហើរត្រង់ ក៏ដូចជាការកសាងមន្ទីរពេទ្យ និងសាងសង់ ជួសជុលផ្លូវជាតិលេខ៣ ព្រមទាំងគាំទ្រអ្នកវិនិយោគិន មកធ្វើការវិនិយោគនៅខេត្តព្រះសីហនុ ៕ ដោយ ងូ សុមុនី